自願性選擇

埋嚟揀,埋嚟揀,打針定核檢任得你揀!呢勻真喺有強姦無焗賭,鑒於目前世界各地新型冠狀病毒肺炎疫情日益嚴峻,衛生局發出似指令的指引,要求工作時須與服務對象接觸,或在有其他人的密閉空間工作,若未接種新型冠狀病毒疫苗,則應至少每七天接受一次新型冠狀病毒核酸檢測。消息一出,無不嘩然,大眾還來不及反應,公職局快過打針再下一道似曠工令的指引,公務員要返工一就打針一就核檢,否則視之為不合理缺勤。

全球疫情看來比想像中來得恐怖更多,不然,落咗大半邊閘禁止外籍人士入境的澳門特區何以如此不安,在接種新冠疫苗上極限施壓。即使現時已開放特定外籍人士申請來澳,但入境後仍需隔離,理論上還是較安全的做法,莫非信唔過打開咗的另一邊閘?衛生局局長羅奕龍強調指引絕對冇違反接種新冠疫苗的自願及可選擇原則,更將個波踢畀公私營實體,按指引自行操刀,也難怪坊間質疑政府“谷針”變“迫針”。

按局長所講不接種疫苗,可選擇核檢作替代。因為有替代方案,不算強迫接種,勉強說得過去。但所謂替代方案,就算打咗針,都唔代表往後不用核檢,又怎稱得上替代,再講新冠疫苗不是「金鐘罩」,核檢也不是次次靈。“自願”應該喺打與唔打,而唔喺有得揀。至於可選擇原則,當初政府講的可選擇是打邊款疫苗,唔喺現在所講的選擇疫苗或核檢,局長可能選擇性失憶。那怕將“防疫”兩個大字當成尚方寶劍,但都要識得耍先得!

山草

自願性選擇