有「軌」都無用

輕軌免費乘搭期延長至明年一月底.jpg

輕軌原定元旦日起正式收費,價錢按站數計算,單程車票最平六蚊,行足十一個站就要十蚊。為了吸引更多人乘搭輕軌,收費方面更提供與巴士相約的優惠,只要購買及申請港鐵(澳門)推出的「輕軌通」,年滿十二歲或以上人士可獲半價;學生享有二點五折優惠;持有長者、殘疾人士「輕軌通」及身高不超過一米的小童更可免費搭乘。不過看看通車以來乘客和社會的反應,即使有優惠,恐怕吸引力還是有限!而政府亦想到補鑊,故免費請大家多搭一個月。

乘坐輕軌為的是快捷方便,但單是付費模式已經不合時宜。澳門輕軌還大聲強調引入各式電子支付平台,方便市民及旅客購買輕軌車票。惟使用電子支付不能直接入閘,想方便少少就要袋多張「輕軌通」出街。其它就不在話下,好似跨區出行,若由氹仔去澳門半島,應該唔會選搭輕軌,加上輕軌與巴士之間暫時未見有特別接駁線,那怕較近的路環石排灣,現時輕軌亦未能去得到,就算有接駁巴士可轉乘,倒不如直接坐巴士仲好!

輕軌氹仔線途經機場和碼頭算是一大賣點,可能會是氹仔居民或旅客選乘的誘因。不過輕軌通車以來發生各種故障,自動又唔掂,人手又唔得,斷電直程唔郁得,真喺有「軌」都無用。逾百億元的建設費、幾十億元的營運管理費,卻換來如此不堪的結果,怎能叫人不失望。輕軌氹仔線建造時間長,施工速度慢,耗資金額巨,早為社會詬病,如今,營運又讓人覺得欠準備,測試咗大半年,故障仍然一籮籮,慘到要乘客突然離坐,冒雨在半空中沿軌道徒步返回車站,叫人點敢坐!

山草

有「軌」都無用